ის, რაც დეპუტატმა ხატია დეკანოიძემ საკუთარ ლიდერზე თქვა, რომ მას მეხსიერების პრობლემები და პერიოდულად მეხსიერების ჩავარდნა აქვს, როგორც ჩანს, მთელს „ნაციონალურ მოძრაობას“ ეხება, - ამის შესახებ ჟურნალისტებს „ქართული ოცნების" დეპუტატმა სოზარ სუბარმა განუცხადა.

როგორც სუბარმა ამ კონტექსტში აღნიშნა, "ნაციონალური მოძრაობის" წარმომადგენლებმა არაერთხელ თქვეს, რომ პარლამენტში არც ერთ შემთხვევაში არ შევიდოდნენ, რადგან პარლამენტი არალეგიტიმური ორგანო იყო, თუმცა შევიდნენ და შემდეგ მიხეილ სააკაშვილის მოწოდების საფუძველზე, ისევ გავიდნენ.

„პარლამენტში შემოსვლა თავად „ნაციონალური მოძრაობის" გადასაწყვეტია. თავის დროზე უფლებამოსილება სწორედ იმის გამო არ შევუწყვიტეთ, რომ შემოსულიყვნენ და ემუშავათ. თუმცა ცხადია, მათი კატეგორიული მოთხოვნები ვერ და არ იქნება მიღებული. პარლამენტში გააგრძელებენ "ხულიგნობას" - რასაც ჰქვია მაგიდებზე ახტომა, პარლამენტის თავმჯდომარის ტრიბუნის დაკავების მცდელობები და ასე შემდეგ. მათგან რაიმე რაციონალური წინადადებები ნაკლებად მოსალოდნელია. პარლამენტში მივიღებთ, მაგრამ "ხულიგნობის" შესაძლებლობას არ მივცემთ", - განაცხადა სოზარ სუბარმა.

სუბარი "არასერიოზულს" უწოდებს "ნაციონალური მოძრაობის" ინიციატივას მიხეილ სააკაშვილთან დაკავშირებით საგამოძიებო კომისიის შექმნის შესახებ. სუბარის შეფასებით, სააკაშვილს ორ საქმეზე აქვს მისჯილი, სხვა საქმეებზე სასამართლო პროცესი გრძელდება და "მიხეილ სააკაშვილის საკითხი პარლამენტის განსახილველი თემა არ არის".