“რეფორმების ჯგუფის“ დეპუტატი პაატა მანჯგალაძე ჯერჯერობით ვერ აკონკრეტებს, მიხეილ სააკაშვილთან დაკავშირებით პარლამენტის საგამოძიებო კომისიის შექმნის ინიციატივას დაუჭერენ თუ არა მხარს და ჩაერთვებიან თუ არა კომისიის მუშაობაში.

როგორც მანჯგალაძემ ჟურნალისტებს განუცხადა, საგამოძიებო კომისიის მიზნებზე მათ უფრო მეტი ინფორმაციისა და დეტალის ცოდნა სჭირდებათ.

“მხოლოდ ამის შემდეგ განვაცხადებთ ჩვენი მხარდაჭერის შესახებ. ასე წინასწარ საგამოძიებო კომისიის შექმნაზე წინააღმდეგობა არ მაქვს, მაგრამ მეტი ინფორმაცია გვჭირდება, რათა კომისიაში მონაწილეობის თაობაზე დასაბუთებულად განვაცხადოთ. არსებობს სხვადასხვა დაინტერესებული ჯგუფები - როგორც პოზიტიურად, ასევე ნეგატიურად. იმისთვის, რომ არასწორი ინტერპრეტაციები ავიცილოთ თავიდან, აუცილებელია ობიექტური, სრულფასოვანი ინფორმაციის არსებობა”, - განუცხადა ჟურნალისტებს პაატა მანჯგალაძემ.

ფრაქცია “ნაციონალური მოძრაობა“ მიხეილ სააკაშვილის მიმართ შესაძლო ძალადობრივი, არაადამიანური და დამამცირებელი მოპყრობის ფაქტების შემსწავლელი პარლამენტის საგამოძიებო კომისიის შექმნის ინიციატივას დღეს დაარეგისტრირებს.