„საერთაშორისო გამჭვირვალობა - საქართველოს“ აღმასრულებელი დირექტორი ეკა გიგაური „ქართული ოცნების“ კრიტიკას პასუხობს და მმართველ პარტიას მოუწოდებს, შეწყვიტოს ადგილობრივი არასამთავრობო ორგანიზაციების დისკრედიტაცია. ამის შესახებ ეკა გიგაურმა „ინტერპრესნიუსს“ განუცხადა, რითაც „ქართული ოცნების“ წევრის, გივი მიქანაძის მიერ ადგილობრივი სადამკვირვებლო ორგანიზაციებისადმი დღეს გაკეთებულ განცხადებას გამოეხმაურა.

ეკა გიგაურის თქმით, მიქანაძის ტონი მიუღებელია, საჩივარი კი, რომლითაც ორგანიზაციამ საარჩევნო ადმინისტრაციას მიმართა, ლეგიტიმური იყო.

„პირველ რიგში, რა ტონითაც ის საუბრობდა, აბსოლუტურად მიუღებელია, იმიტომ, რომ ჩვენი დაკვირვების ხარისხი ნამდვილად არ დაიწუნება, არანაირი პრობლემა არ აქვს. მეორე - ჩვენი საჩივარი იყო აბსოლუტურად ლეგიტიმური და კანონის ინტერპრეტაციას აკეთებს შესაბამისი ორგანო, საარჩევნო ადმინისტრაცია, რომელსაც ჩვენ მივმართეთ და შესაბამისად, მან უნდა გადაწყვიტოს ამ საჩივარში იყო თუ არა სწორი მოთხოვნები. დღეს, როდესაც მმართველი პარტია წინასწარ აკეთებს განცხადებას, თუ რა გადაწყვეტილება უნდა მიიღოს საარჩევნო ადმინისტრაციამ, ეს არის აბსოლუტურად მიუღებელი იმის გათვალისწინებით, რომ კითხვები არის თვითონ ამ ადმინისტრაციის დამოუკიდებლობასთან დაკავშირებით. ყველა ვაკვირდებით, როგორ იმუშავებენ ისინი ამ არჩევნების პერიოდში. ამიტომ, ფაქტობრივად, მათ დავალება და გეზი მისცეს ადმინისტრაციას, რა გადაწყვეტილება მიიღოს ამ კონკრეტულ საჩივართან დაკავშირებით. რა ტონითაც საუბრობენ სადამკვირვებლო ორგანიზაციებზე, ეს არის ჩვენი დისკრედიტაციის მცდელობა, რაც აბსოლუტურად მიუღებელია, ამიტომ, ჩვენ მათ მოვუწოდებთ, რომ კანონის შესაბამისად იმოქმედონ და შეწყვიტონ ადგილობრივი არასამთავრობო ორგანიზაციების დისკრედიტაცია“, - აცხადებს ეკა გიგაური.

შეგახსენებთ, საპარლამენტო უმრავლესობის წევრმა გივი მიქანაძემ დღეს მოუწოდა ადგილობრივ სადამკვირვებლო ორგანიზაციებს, „მომავალში მეტი ყურადღებით დააკვირდნენ საარჩევნო ღონისძიებებს და აღარ დაუშვან არასწორი ინტერპრეტირება და შეფასება, რამაც საარჩევნო გარემოზე უარყოფითი გავლენა შეიძლება იქონიოს“.

როგორც მან აღნიშნა, „საერთაშორისო გამჭვირვალობა - საქართველომ“ არასწორი ინტერპრეტაციით შეაფასა ოზურგეთის მერობის კანდიდატის, ავთანდილ თალაკვაძის სამედიცინო პერსონალთან შეხვედრა.