დონალდ ტრამპი კანადურ საქონელზე ახალი ტარიფების დაწესებას აპაუზებს და ამბობს, რომ ქვეყნები შეთანხმებასთან ახლოს არიან

აშშ-ის პრეზიდენტის დონალდ ტრამპის განცხადებით, კანადურ საქონელზე ახალი ტარიფების დაწესებას სამი დღით გადადებს, რადგან აშშ და კანადა სავაჭრო შეთანხმებაზე მუშაობენ და მის მიღწევასთან ახლოს არიან.

„კანადის წინააღმდეგ 50%-იანი ტარიფები, რომლებიც ხვალ დილით უნდა ამოქმედებულიყო, სამდღიანი ვადით შევაჩერე იმის გათვალისწინებით, რომ კანადა და აშშ, დოკუმენტების დასრულების შემდეგ, შეთანხმებას მიაღწევენ!“ - განაცხადა ტრამპმა სოციალურ ქსელში.

მისივე თქმით, საბოლოო სავაჭრო შეთანხმებამ შეიძლება Keystone XL მილსადენის აღდგენის საშუალება გააჩინოს. ნავთობსადენი, რომელიც ალბერტას აშშ-სთან დააკავშირებს, ბარაკ ობამასა და ჯო ბაიდენის ადმინისტრაციებმა დაბლოკეს.

„შესაძლოა, დიდი Keystone XL მილსადენი, რომელიც დიდი ხნის წინ გაანადგურა მძინარე ჯო ბაიდენმა, საფლავიდან აღდგეს!“ - დაწერა ტრამპმა Truth Social-ზე.

აღსანიშნავია, რომ დონალდ ტრამპმა და კანადის პრემიერ-მინისტრმა მარკ კარნიმ მიმდინარე კვირაში ორჯერ ისაუბრეს. ქვეყნები ინტენსიურ სავაჭრო მოლაპარაკებებს აწარმოებენ ივლისიდან, მას შემდეგ, რაც ტრამპი ახალი გადასახადის დაწესებით დაიმუქრა.