რუსული მხარის ინფორმაციით, კრასნოდარში დრონებით თავდასხმის შედეგად ერთი ადამიანი დაიღუპა და 10 დაშავდა
რუსეთის კრასნოდარის მხარეში ღამით დრონებით განხორციელებული თავდასხმის შედეგად ერთი ადამიანი დაიღუპა და 10 დაშავდა, - ამის შესახებ რეგიონის გუბერნატორმა, ვენიამინ კონდრატიევმა განაცხადა.
„არმავირში დრონის ნამსხვრევები ერთ-ერთი საწარმოს ტერიტორიას დაეცა, რის შედეგადაც ერთი თანამშრომელი დაიღუპა. კრასნოდარში საწყობის კომპლექსზე თავდასხმის შედეგად ათი ადამიანი დაშავდა. სამი მძიმე მდგომარეობაშია. თავდასხმის და საწყობში გაჩენილი ხანძრის შედეგების აღმოფხვრის სამუშაოები გრძელდება“, - დაწერა კონდრატიევმა სოციალურ ქსელში.
გარდა ამისა, მისი თქმით, დრონის ფრაგმენტები კრასნოდარში ორ საცხოვრებელ კორპუსს, სოფელ დინსკაიაში კი ორ კერძო სახლს მოხვდა. შედეგად არავინ დაშავებულა.
