უკრაინის საზღვარზე ჯარების უპრეცედენტო განლაგებით და „ცივი ომის“ პერიოდის მსგავსი მოთხოვნებით რუსეთი ევროპული სამშვიდობო წესრიგის ფუნდამენტურ პრინციპებს უპირისპირდება, - ამის შესახებ გერმანიის საგარეო საქმეთა მინისტრმა, ანალენა ბერბოკმა განაცხადა.

BBC-ი წერს, რომ გერმანიის საგარეო უწყების ხელმძღვანელმა იგულისხმა ის მოთხოვნები, რომელიც რუსეთმა ე.წ. უსაფრთხოების გარანტიებთან დაკავშირებით დასავლეთს წაუყენა და რომლითაც რუსეთი ცდილობს შეზღუდოს დასავლეთის სამხედრო ძალა მეზობელ ქვეყნებში, რომლებსაც რუსეთი საკუთარი გავლენის სფეროებად მიიჩნევს. დასავლეთი კი ეწინააღმდეგება მოსაზრებას, რომ რუსეთს აქვს უფლება გავლენა მოახდინოს მეზობელი ქვეყნების საგარეო პოლიტიკაზე, როგორც ამას საბჭოთა კავშირი „ცივი ომის“ დროს აკეთებდა.

ანალენა ბერბოკმა მოსკოვს მოუწოდა, გადადგას სერიოზული ნაბიჯები უკრაინის კრიზისის დეესკალაციისკენ. მისი თქმით, „მშვიდობისკენ მიმავალი პატარა ნაბიჯებიც კი უკეთესია, ვიდრე დიდი ნაბიჯები ომისკენ".