ჯანდაცვის მინისტრის მოადგილე თამარ გაბუნია განმარტავს, თუ რატომ მიიღო ჯანდაცვის სამინისტრომ გადაწყვეტილება ბიულეტენის ტოლფას დოკუმენტად ტესტის დადებითი პასუხი ჩათვლილიყო. როგორც გაბუნიამ ჟურნალისტებთან განმარტა, აქტიური შემთხვევების მაღალი ნაკადის პირობებში, მოქალაქეებს ბიულეტენის მიღებასთან დაკავშირებით შეფერხებები შეექმნათ და სამინისტრომ ეს გადაწყვეტილება სწორედ ამ მიზეზით მიიღო, რათა ერთი მხრივ გაემარტივებინა პროცედურა ინფიცირებული პირისთვის, მეორე მხრივ, კი სამინისტროს მოხსნოდა ადმინისტრაციული ტვირთი.

„აქტიური შემთხვევების მაღალი ნაკადის პირობებში, მოქალაქეებს შეექმნათ გარკვეული შეფერხება, რომ მიეღოთ ცნობა, რასაც გასცემდა ჯანდაცვის სამინისტრო მათი იზოლაციაში ყოფნის ან ინფიცირების თაობაზე, როცა იყო მსუბუქი ან საშუალო სიმძიმის შემთხვევა. იმისთვის, რომ ეს ბარიერი მოხსნილიყო, ჯანდაცვის სამინისტრომ მიიღო რეგულაცია, რომლის თანახმად, დამსაქმებლისთვის საფუძველი, რომ მან აანაზღაუროს განაცდური დღეები, არის უკვე ანტიგენის ან "პისიარ ტესტის ცნობა ანუ ლაბორატორიული პასუხი დადასტურების თარიღიდან მომდევნო შვიდი დღის განმავლობაში, რაც არის მინიმალური იზოლაციის პერიოდი, რაც არის საფუძველი იმისთვის, რომ მოქალაქემ მიიღო განაცდურის ანაზღაურება, რაც ამარტივებს პროცედურებს და მოქალაქეებს აღარ უწევთ ცნობისთვის დროის დახარჯვა. ეს ადმინისტრაციული ტვირთი მოიხსნა სამინისტროსთვისაც", - განაცხადა გაბუნიამ.

ინფორმაციისთვის, COVID-19-ით ინფიცირებულმა პაციენტებმა, რომლებსაც არ დასჭირდათ ხანგრძლივი სამედიცინო მეთვალყურეობა და მათი იზოლაციის ვადა შემოიფარგლა 7-8 დღით, სამუშაო ადგილზე საავადმყოფო ფურცლის(ბიულეტენი) ნაცვლად შესაძლებელია წარადგინონ სწრაფი ან PCR ტესტის დადებითი პასუხი.