ამ ეტაპზე უკრაინაში ვიზიტი არ იგეგმება - როდესაც საერთაშორისო პარტნიორები მაღალი დიპლომატიური სიფრთხილითა და სიზუსტით მოქმედებენ, ბუნებრივია, ჩვენი ნაბიჯებიც სწორედ ასეთია, - აღნიშნული განმარტება ჟურნალისტებთან "ქართული ოცნების" დეპუტატმა ალუდა ღუდუშაურმა გააკეთა.

მისივე თქმით, საქართველო დგას იქ, სადაც მთელი ცივილიზებული სამყარო და საერთაშორისო პარტნიორები დგანან - "არამც და არამც არც მარცხნივ და არც მარჯვნივ". ამ კონტექსტში ღუდუშაური იმასაც ამბობს, რომ ოპონენტების მხრიდან ადგილი აქვს პოლიტიკურ კეკლუცობას.

"უნდა ვიყოთ ძალიან ფრთხილები. მთელი ჩვენი ძალისხმევა მიმართული უნდა იყოს იმისკენ, არ იქნას ომი დაშვებული. ჩვენი ოპონენტების მხრიდან ძალიან საშიშ პოლიტიკურ კეკელუცობას აქვს ადგილი. მთელი ცივილიზებული სამყაროს სრული ძალისხმევა, მათ შორის ჩვენიც- რაც ჩვენ ხელგვეწიფება მიმართულია იქეთკენ, რომ არ იყოს ომი. საქართველომ უკრაინასთან დაკავშირებით ძალიან მკაფიო და მაღალი დიპლომატიური სტანდარტების მქონე მხარდამჭერი რეზოლუცია მიიღო. რასაც ოპონენტები გვიკიჟინებენ არის ამორალური პოლიტიკური კეკლუცობა", - განაცხადა ალუდა ღუდუშაურმა.