დაავადებათა კონტროლის ეროვნული ცენტრის ხელმძღვანელი ამირან გამყრელიძე წინა დღეებთან შედარებით გარდაცვალების დღევანდელი მონაცემების ზრდის მიზეზებს განმარტავს.

როგორც მან უწყებათაშორისი საკოორდინაციო საბჭოს სხდომის შემდეგ განაცხადა, დღეს გარდაცვალება ინფიცირებულთა ოდენობის 1.19%-ს შეადგენს.

„როგორც ჩანს, გარდაცვალების დღევანდელი მონაცემი - 54 უკავშირდება გარკვეულად აღრიცხვიანობას, ამ 54-ში შედის წინა დღეებიც და ამაზე დავალება შესაბამისმა სტრუქტურებმა მიიღეს. ანუ ატვირთვა და რეპორტინგი 24 საათში არ ხდება, ნაკლებია რეალურად, მაგრამ მაინც გარდაცვალების მაჩვენებელი ზღურბლოვან მაჩვენებელზე, 8-9 მილიონ მოსახლეზე 27-29 ყოველდღიურად, მაღალი გვაქვს, მაგრამ არა 80-75 და ა.შ როგორც გვქონდა. ბევრი რამ შეიძლება იყოს პრობლემა გარდაცვალებასთან დაკავშირებით. ეს არის პირველ რიგში, ახალი შემთხვევების მაღალი რაოდენობა. როგორ კარგადაც არ უნდა იყოს სისტემა აწყობილი, გარდაცვალების პროცენტი 1000-ზე ყოველთვის იქნება დაახლოებით 0.5-1.4%-ის ფარგლებში. დღეს ჩვენ ინფიცირებულზე გარდაცვალება გვაქვს 1.19%-ის ფარგლებში ანუ ეს ჩამოვიდა დაბლა, რამეთუ „ომიკრონთან“ მიმართებით როგორც ჰოსპიტალიზაცია, ისე გარდაცვალების მაჩვენებელი დაბლაა წამოსული. როცა გაქვს მაღალი ინფიცირების მაჩვენებელი, სამწუხაროდ, ფატალური შედეგი გვექნება. სიკვდილობის 86% მოდის 60 ზემოთ მოსახლეობაში“, - განაცხადა გამყრელიძემ.