ალეკო ელისაშვილი - „ქართული ოცნების“ შემუშავებელი რეზოლუცია გამაოგნებელია, უკრაინაზე საუბრობდე და მტერს არ ახსენებდე, რანაირი რეზოლუციაა - აბა, ჭინკები შეესივნენ უკრაინას და ისინი ემუქრებიან?!
ის რეზოლუცია რაც „ქართულმა ოცნებამ" შეიმუშავა, გამაოგნებელია, უკრაინაზე და მის საფრთხეებზე საუბრობდე და მტერს არ ახსენებდე, რანაირი რეზოლუციაა - აბა, ჭინკები შეესივნენ უკრაინას თუ ჭინკები ემუქრებიან საზღვარზე?! - ასე ეხმიანება "მოქალაქეების" ლიდერი, დეპუტატი ალეკო ელისაშვილი უკრაინის მხარდამჭერი რეზოლუციის პროექტის ტექსტს, რომელიც "ქართულმა ოცნებამ" წარადგინა.
მისი თქმით, პარლამენტმა აუცილებლად უნდა მიიღოს რეზოლუცია, სადაც ნახსენები იქნება რუსეთი და მას ყველა პარტიის მხარდაჭერა უნდა ჰქონდეს.
"უთავმოყვარეობაა და გაუგებარია რუსეთის არ ხსენება, ვისურვებდი ტექსტი იყოს ადეკვატური, რუსეთიც იყოს ნახსენები და რეალობა იყოს აღწერილი და აბსოლუტურად ყველამ დავუჭიროთ მხარი მეგობარ ქვეყანას, რომელიც გასაჭირშია. იმედი მაქვს, დაკორექტირდება ტექსტი, თუ არა, ეს იქნება ძალიან დიდი სირცხვილი თითოეული ჩვენგანის", - განაცხადა ელისაშვილმა.
ის ასევე გამოეხმაურა "ნაციონალური მოძრაობის" ბოიკოტის დასრულებას და დადებითად შეაფასა.
"არ მესმის ისეთი ბოიკოტის, ხელფასი რომ არ დაგექვითოს, ამისთვის კომიტეტების სხდომის ოქმს რომ ხელს აწერ და მერე ვითომ ბოიკოტში ხარ. ე.ი. მუშაობა გეზარება, ეს იყო "ნაციონალური მოძრაობის" ე.წ. ბოიკოტი. კარგი იქნება თუ საპარლამენტო საქმიანობაში ჩაერთვებიან აქტიურად და მათი საპარლამენტო საქმიანობა მაგიდაზე ახტომით არ შემოიფარგლება,"- განაცხადა ელისაშვილმა.
