ჩვენ, დიდი ალბათობით, კალანდარიშვილს მხარს დავუჭერთ, - ამის შესახებ "მოქალაქეების" დეპუტატმა ალეკო ელისაშვილმა ჟურნალისტებთან ცესკო-ს თავმჯდომარეობის კანდიდატ გიორგი კალანდარიშვილთან შეხვედრის შემდეგ განაცხადა.

როგორც მან აღნიშნა, დღევანდელ შეხვედრაზე კალანდარიშვილთან ისაუბრეს, რომ საარჩევნო სიებთან დაკავშირებით კანონმდებლობა უფრო ადეკვატური უნდა გახდეს.

"ჩვენ შეფასებას თუ ვინმე არ ენდობა, ამოიღოს ნებისმიერი საერთაშორისო, IRI იქნება, NDI თუ სხვა ან ადგილობრივი სადამკვირვებლო ორგანიზაციების შეფასებები, სადაც წერია, რომ საარჩევნო ადმინისტრაციამ არჩევნების ადმინისტრირება ჩაატარა ძალიან კარგად და იყო ძალიან ორგანიზებული არჩევნები, მაშინ ცესკო- ს ხელმძღვანელობდა გიორგი კალანდარიშვილი და შესაბამისად, მის აქტივშია ეს ჩატარებული არჩევნები. ამიტომ მხარს ვუჭერთ. თუმცა, დღევანდელ შეხვედრაზე მაინც გვქონდა საუბარი, რომ უფრო ადეკვატური უნდა გახდეს ზოგადად საარჩევნო კანონმდებლობა, ეს ცესკო- ს პირდაპირ არ ეხება და პარტიების რეგისტრაციის საკითხი იქნება თუ სიების წარდგენა, უფრო პატიოსანი უნდა გახდეს.

ჩვენ ვიცით, რომ სიების წარდგენისას თავს ვიტყუებთ და ნათესავებს ვსვამთ ხოლმე, რომ სია იყოს სრული, ამაზე ვესაუბრებოდით კალანდარიშვილს და პირობა გვაქვს, რომ საერთაშოროსო კანონმდებლობას ჩახედავს და ადეკვატურს გავხდით,"- განაცხადა ელისაშვილმა.

ცნობისათვის, კალანდარიშვილი "მოქალაქეებთან" ერთად "გირჩის" დეპუტატებსაც შეხვდა, დღესვე მან შეხვედრა გამართა ასევე "ევროპელ სოციალისტებთან".