უქმდება აკრძალვა, რომლის მიხედვით, არ შეიძლება იუსტიციის უმაღლესი საბჭოს წევრად ერთი და იგივე პირი ზედიზედ ორჯერ აირჩეს. ამას “საერთო სასამართლოების შესახებ კანონში“ დაგეგმილი ცვლილებები ითვალისწინებს, რომელიც უმრავლესობის დეპუტატებმა მოამზადეს.
ინიციატორთა შეფასებით, არსებული აკრძალვის მოხსნა პროფესიული გამოცდილებისა და დამსახურების პრინციპზე დაყრდნობით საბჭოს დაკომპლექტების შესაძლებლობას გაზრდის.
„ის, თუ რამდენად იმსახურებს კონკრეტული პირი იუსტიციის უმაღლესი საბჭოს წევრობას, მათ შორის ზედიზედ მეორე ჯერზე არჩევას, მიზანშეწონილია უშუალოდ მისი არჩევის უფლებამოსილების მქონე სუბიექტმა შეაფასოს, ყოველგვარი გაუმართლებელი ბლანკეტური შეზღუდვის გარეშე“, - ნათქვამია პროექტის განმარტებით ბარათში.
კანონპროექტი “ქართული ოცნების“ დეპუტატებმა: - გურამ მაჭარაშვილმა, გივი მიქანაძემ, რატი იონათამიშვილმა, გიორგი ამილახვარმა, ანრი ოხანაშვილმა და ალექსანდრე ტაბატაძემ მოამზადეს. ინიციატორები “საერთო სასამართლოების შესახებ“ ორგანულ კანონში დაგეგმილი ცვლილებების პროექტის დაჩქარებული წესით განხილვას ითხოვენ.