ზუსტად ისეთივე წარმატებით შემიძლია ბატონ კობახიძეს დავაბრალო, რომ ისინი აპირებენ ელენე ხოშტარიას მოწამვლას, ოღონდ წინასწარ, პრევენციის მიზნით, ამას სხვას აბრალებენ, - ასე შეაფასა „ევროპული საქართველოს“ გენერალურმა მდივანმა, აკაკი ბობოხიძემ „ქართული ოცნების“ თავმჯდომარის ირაკლი კობახიძის დღევანდელი განცხადება.

ბობოხიძე მიიჩნევს, რომ მსგავსი ტიპის განცხადებები სახიფათოა.

„ქართული ოცნებისგან“ ეს, რა თქმა უნდა, მოულოდნელი არ არის, მაგრამ ზუსტად ისეთივე წარმატებით შემიძლია ბატონ კობახიძეს დავაბრალო, რომ ისინი აპირებენ ელენე ხოშტარიას მოწამვლას, ოღონდ წინასწარ, პრევენციის მიზნით, ამას სხვას აბრალებენ. ასე რომ, ბატონ ირაკლის მინდა მივმართო, ერთნაირი წარმატებით შეიძლება იყოს ორივე ვერსია განხილული. აქედან გამომდინარე, სწორედ მსგავსი ტიპის განცხადებებია ხიფათის შემცველი. ასეთ განცხადებებს არ უნდა აკეთებდნენ. ნებისმიერ შემთხვევაში, ხელისუფლება არის პასუხისმგებელი იმაზე, რომ კანონის საწინააღმდეგო რაიმე ტიპის მოქმედება ხდება ქვეყანაში, ვისგანაც არ უნდა მომდინარეობდეს.

ვერ აიცილებენ ამ პასუხისმგებლობა. ვერ აიცილებენ იმ ზიანს, რასაც თავიანთი არასწორი პოლიტიკური მოქმედებებით ქვეყანას აყენებენ, კონკრეტულ ადამიანებზე სულ რომ არაფერი ვთქვათ“, - განაცხადა ბობოხიძემ.

ცნობისთვის, ირაკლი კობახიძემ ბრიფინგზე განაცხადა, რომ ერთ-ერთ ოპოზიციურ შეხვედრაზე „დროას“ ლიდერის, ელენე ხოშტარიას მოწამვლის საკითხი განიხილებოდა.