არასრულწლოვნის წინააღმდეგ გარკვეული დანაშაულის ჩადენისას, პირობითი მსჯავრის გამოყენება აიკრძალება

არასრულწლოვნის წინააღმდეგ იმ დანაშაულების ჩადენის შემთხვევაში, რომელიც დაკავშირებულია პროსტიტუციაში ჩაბმასთან ან/და ხელშეწყობასთან, ასევე პორნოგრაფიული ნაწარმოების დამზადება/გასაღებასთან, პირობითი მსჯავრის გამოყენება აიკრძალება. შესაბამისი საკანონმდებლო ცვლილებები პარლამენტმა მესამე მოსმენით (76 მომხრე) დაამტკიცა.

ცვლილება შედის სსკ-ის 73-ე პრიმა მუხლშიც, რომელიც მსჯავრდებულის გამოძიებასთან თანამშრომლობის შედეგად სასჯელის გადახედვას ითვალისწინებს.

კანონპროექტის თანახმად, არასრულწლოვანთა პროსტიტუციასთან და პორნოგრაფიასთან დაკავშირებული დანაშაულების ჩადენის შემთხვევაში, აკრძალული იქნება მსჯავრდებულის სასჯელისაგან სრულად გათავისუფლება. ცვლილებების თანახმად, პროსტიტუციაში ორი ან მეტი პირის ჩაბმა, ასევე იმ პირის ჩაბმა, რომელიც დამნაშავის მზრუნველობის (მეურვეობის) ქვეშაა ან მისი ოჯახის წევრია, დამამძიმებელი გარემოება ხდება და გათვალისწინებული იქნება უფრო მკაცრი სასჯელი. მკაცრდება სასჯელი ასევე არასრულწლოვნის გამოსახულების შემცველი პორნოგრაფიული ნაწარმოების შეთავაზებაზე, გავრცელებაზე, გადაცემაზე, რეკლამირებაზე ან ხელმისაწვდომობის სხვაგვარ უზრუნველყოფაზე. ამგვარი დანაშაულების შემთხვევაში, ნაცვლად 3 წლისა, გათვალისწინებული იქნება თავისუფლების აღკვეთა ცხრიდან თხუთმეტ წლამდე. არასრულწლოვანთა პორნოგრაფიასთან დაკავშირებული დანაშაულის განმეორებით ჩადენისთვის, ასევე ოჯახის წევრის ან მეურვეობის ქვეშ მყოფი პირის მიმართ ჩადენისთვის, გათვალისწინებული იქნება თავისუფლების აღკვეთა 15-დან 20 წლამდე, ან უვადოდ. ასევე, პროექტის თანახმად, ბავშვთა სექსუალური ექსპლუატაციისკენ მიმართული ყველა კატეგორიის დანაშაულისათვის უქმდება სისხლისსამართლებრივი პასუხისმგებლობისაგან გათავისუფლების ხანდაზმულობის ვადა. კანონპროექტის ინიციატორების განმარტებით, პროექტით გათვალისწინებული ცვლილება ძალადობის მსხვერპლ ბავშვებს მისცემს დამატებით დროს მათ წინააღმდეგ განხორციელებული დანაშაულებრივი აქტების შესახებ სამართალდამცავი ორგანოების ინფორმირებისთვის. კანონპროქტის თანახმად, სსკ-ის 137-ე და 138-ე მუხლებს, რომლებიც გაუპატიურებასა და სექსუალური ხასიათის სხვაგვარ ქმედებას გულისხმობს, ემატება დამამძიმებელი გარემოების პუნქტი: „ნდობის, ავტორიტეტული ან გავლენიანი მდგომარეობის გამოყენებით“. კანონპროექტის ინიციატორთა განმარტებით, დღეს არსებული დამამძიმებელი გარემოება - „სამსახურებრივი მდგომარეობის გამოყენება“ სრულად ვერ ფარავს იმ შემთხვევებს, რაც მოიაზრება ნდობით, ავტორიტეტით ან გავლენიანი მდგომარეობით ბოროტად სარგებლობაში. კანონპროექტის ინიციატორები არიან: სოფო კილაძე, ირაკლი კობახიძე, შალვა კიკნაველიძე, მერაბ ქვარაია, რატი იონათამიშვილი, ილია ნაკაშიძე, დიმიტრი მხეიძე, დავით მათიკაშვილი, ანრი ოხანაშვილი, პაატა მხეიძე, გია ბენაშვილი, ცოტნე ზურაბიანი, გოგი მეშველიანი, ენძელა მაჭავარიანი, სვეტლანა კუდბა, ფატი ხალვაში.

ვახტანგ ძაბირაძე -  ხელისუფლება ღიად საუბრობს, რომ მას საქართველოში არ უნდა ევროპული არჩევნების ჩატარება, მთავარი ისაა, რომ ხელისუფლების ასეთ განცხადებებს ოპოზიციურ ელექტორატში ადეკვატური რეაქცია არ აქვს
ალექსანდრე თვალჭრელიძე - ნებისმიერი დონის არჩევნების ბოიკოტი გამოუსწორებელი შეცდომაა
ქართული პრესის მიმოხილვა 19.06.2025
„ზრუნვა წყალივით გვჭირდება“ - ნატურალური მინერალური წყალი „ბაკურიანი“ ახალ საკომუნიკაციო კამპანიას იწყებს
Herbalife „დაბალანსებული კვების“ კატეგორიაში ოქროს ბრენდის გამარჯვებული ზედიზედ მეოთხედ გახდა
Skillwill-ის კოლეჯს ავტორიზაცია მიენიჭა - პროფესიული განათლების ახალი ეტაპი საქართველოში
„სილქნეტის“ და „თიბისის“ ერთობლივი შეთავაზება - დაიბრუნე გადახდილი თანხის 30% ულიმიტო ინტერნეტის გააქტიურებისას